026/у формасындагы баланын медициналык картасы «Түндүк» тиркемесинде жеткиликтүү болду. Бишкек шаардык ден соолукту чыңдоо борбору билдиргендей, биринчи этапта бул кызмат пилоттук режимде Нарын облусунда ишке киргизилди.

Маалыматка ылайык, эми ата-энелер тиркеме аркылуу баланын профилактикалык медициналык кароодон өткөн жыйынтыктарын, дарыгерлердин корутундуларын жана сунуштамаларын көрө алышат.

Мындан тышкары, кагаз түрүндөгү маалымкатты мектепке же бала бакчага колго алып баруунун кажети жок болот. Керектүү маалыматтар маалыматтык системалардын ортосунда автоматтык түрдө өткөрүлүп берилет.

026/у формасы — бул бала бакчага, мектепке, колледжге же интернатка кабыл алууда талап кылынган баланын медициналык картасы. Анда баланын профилактикалык кароолордон өткөндүгү, алган эмдөөлөрү жана ден соолугунун абалы тууралуу маалыматтар камтылат.