2026–2027-окуу жылынан баштап мектептердин 8-класстарында профилге чейинки даярдоонун алкагында биология жана химия багыттары боюнча жаңы программалар окутула баштайт. Бул тууралуу Агартуу министрлиги билдирди.

Биология багыты:
Окуучулар үчүн «Адам жана анын ден соолугу» (тереңдетип окутуу) жана «Ден соолук жана жашоо көндүмдөрү» программалары сунушталат. Бул сабактарда адам организминин иштеши, туура тамактануу, иммунитет жана психоэмоционалдык ден соолук боюнча терең билим берилет. Ошондой эле биринчи жардам көрсөтүү, кан басымын өлчөө сыяктуу практикалык көндүмдөр үйрөтүлөт.

Химия багыты:
«Жашоодогу химия» программасы 34 окуу саатына эсептелген. Анын максаты — химиянын күнүмдүк турмуштагы жана экологиядагы маанисин ачып берүү, ошондой эле окуучуларды STEM-кесиптерге кызыктыруу. Программа заттардын касиеттерин, атомдордун түзүлүшүн изилдөөнү жана химиялык эксперименттерди жасоону камтыйт.

Министрлик бул программалар окуучулардын келечектеги кесиптик багытын (медициналык, илимий ж.б.) аң-сезимдүү тандоосуна негиз түзүү максатында иштелип чыкканын билдирди. Бардык окуу материалдары жана методикалык сунуштар Кыргыз билим берүү академиясынын расмий сайтында (www.kao.kg) жеткиликтүү.

Буга чейин жаңы окуу жылынан баштап мектептерде 8-класстарга «Инженердик технологиялар» программасы окутула баштаары белгилүү болгон. Бул программа дагы профилге чейинки даярдоонун алкагында киргизилет. Анда окуучулар программалоо, робототехника, инженердик долбоорлоо жана IT-инструменттер менен иштөө боюнча билим алышат.