24-июлдун түнүндө Балыкчы–Бишкек багыты боюнча жүрүп бара жаткан жүргүнчү поездин Токмок тилкесинде белгисиз адамдар таш бараңга алышты. Бул тууралуу «Кыргыз темир жолу» мамлекеттик ишканасы билдирди.

Маалыматка ылайык, бейбаштар VIP вагонду кошкондо бир нече вагондун терезесине таш ыргыткан. Терезелер соккуга чыдамдуу болгондуктан сынган эмес, бирок жаракалар пайда болгон. Окуя маалында вагондордо жүргүнчүлөр болгон.

Учурда келтирилген зыян эсептелип, укук коргоо органдарына тиешелүү маалыматтар өткөрүлүп берилди.

Белгилей кетсек, буга чейин апрель айында дагы ушундай окуя катталган. «Кыргыз темир жолу» мындай мыйзамсыз аракеттерди кескин айыптап, күнөөлүүлөр мыйзам алдында жоопко тартыларын эскертти.