Баткенде милиция кызматкерлери 61,8 миң сом салынган сумкасын жоготуп алган аялга акчасын кайтарып берди. Бул тууралуу облустук милициядан билдиришти.
Маалыматка караганда, 27-апрелде эртең мененки саат 06:00до Лейлек районунун милиция кызматкерине жолдун четинде сумка жаткандыгы тууралуу маалымат түшкөн. Маалымат түшөрү менен майор Зулпидин Аширов айтылган дарекке барган. Ал жолдун жээгинде жаткан сумканы алып караганда, ичинде 61,8 миң сом болгон. Милиция кызматкери сураштырып отуруп сумканын ээси ким экенин тапкан. Ал Раззаков шаарынын тургуну болуп чыккан. Аял киши Ош шаарына жөнөп жатып, акча салынган сумкасын жолдо жоготуп алган.
Сумканын ээси акчасын кайтарып берген милиция кызматкерлерине ыраазычылык билдирген.
