Бишкек шаарындагы №6 Үй-бүлөлүк медицина борборунда мамлекеттик жана муниципалдык кызматчыларды профилактикалык медициналык текшерүүдөн (Check-up) өткөрүү боюнча пилоттук долбоор ишке ашырылууда. Бул тууралуу Саламаттык сактоо министрлиги билдирди.

Долбоор президенттин тапшырмасына ылайык уюштурулуп, 31-декабрга чейин уланат. Анын максаты — өнөкөт жугуштуу эмес ооруларды жана тобокелдик факторлорун алдын ала аныктоо моделин сыноодон өткөрүү.

Программада базалык, терапиялык, ошондой эле ар кандай курактагы эркектер жана аялдар үчүн өзүнчө топтомдор каралган. Текшерүүлөр дарыгерлердин кеңешин, лабораториялык анализдерди жана аспаптык изилдөөлөрдү камтыйт. Жыйынтыгында үй-бүлөлүк дарыгер ден соолук тобун аныктап, корутунду чыгарат. Маалыматтар «Sanarip Clinic» системасындагы Check-up санарип модулуна катталат.

Текшерүү акы төлөнүүчү негизде жүргүзүлөт. Кызматкерлер топтомдорду өз алдынча тандашат, алардын баасы 2 миң 29 сомдон 3 миң 886 сомго чейин белгиленген. Борбордун каттоо бөлүмүнө кайрылган жарандар алдын ала бекитилген график боюнча кабыл алынат.

Долбоор аяктаган соң чыгымдарга жана жыйынтыктарга талдоо жүргүзүлүп, Check-up топтомдору үчүн бирдиктүү прейскурант түзүү жана текшерүү моделин өнүктүрүү боюнча сунуштар иштелип чыгат.