Кадамжай районунда жергиликтүү тургун аялын бычактап, андан соң асынып алган. Бул тууралуу Баткен облустук милициясынын басма сөз кызматы билдирет.
Маалыматка караганда, 19-июнда саат 04:00 чамаларында Кадамжай шаарынын 1987-жылы туулган тургуну Н.Б. жана 1987-жылы туулган Б.Б. аттуу жубайы ортосунда чыр чыккан.
“Чырдын кесепетинен жолдошу жубайына бир нече жолу бычак сайып, мыкаачылык менен өлтүргөн. Андан соң кылмышка шектүү Б.Б. Кадамжай районундагы Көтөрмө айыл аймагындагы айылдардын бириндеги салынып бүтө элек үйүнө барып асынып алган.
Аталган факты кылмыштардын бирдиктүү реестрине катталып, Кылмыш-жаза кодексинин адам өлтүрүү беренеси менен кылмыш иши козголуп, тергөө амалдары жүрүп жатат”, — деп айтылат маалыматта.
