Талас облусунда «Манас Ордо» улуттук комплексин реконструкциялоо иштерин текшерүү учурунда курулуш министри Нурдан Орунтаев менен башкы подрядчы «Тооашкан» ЖЧКсынын өкүлүнүн ортосунда пикир келишпестик жаралды.

Орунтаев аткарылып жаткан иштердин сапатын жана курулуштун темпин сынга алды. Анын айтымында, учурдагы абал объектти реконструкциялоону белгиленген мөөнөттө аяктоого тоскоолдук жаратышы мүмкүн.

Министр менен подрядчы компаниянын өкүлүнүн ортосундагы кайым айтышуу түздөн-түз курулуш аянтында болгон. Ведомствонун башчысы «Манас Ордону» реконструкциялоо иштери республикалык бюджеттен каржыланарын жана иштерди Кыргызстандын Эгемендүүлүк күнүнө карата аяктоо пландалып жатканын эскертти.

Министр аткарылып жаткан иштердин сапатын талаптагыдай камсыз кылууну жана курулуштун белгиленген мөөнөттөрүн сактоону талап кылды.