Ош шаарынын мэриясы буга чейин жергиликтүү тургун даттанган Моминов көчөсү, 1 дарегиндеги беш кабаттуу имараттын курулушуна байланыштуу кырдаал боюнча түшүндүрмө берди. Муниципалитеттен Reporter.kg порталына билдиришкендей, көрсөтүлгөн дарек боюнча текшерүү жүргүзүлгөн.

«Текшерүүнүн жүрүшүндө аймактын белгиленген чектери бузулбаганы аныкталды. Курулуш иштерине тиешелүү бардык архитектуралык документтердин жана техникалык көзөмөл боюнча талаптардын сакталгандыгы аныкталды. Тиешелүү маалыматтар белгиленген тартипте реестрге катталган», — деп айтылат маалыматта.

Ошол эле учурда мэриядан белгилешкендей, аныкталган жагдайларга байланыштуу Кыргызстандын мыйзамдарында каралган тартипте айып пул салынган. Билдирүүдө айып пул так кайсы эреже бузуу үчүн жана канча өлчөмдө салынганы такталган эмес.

Түштүк борбордун мэриясынын басма сөз кызматы бүгүн кырдаал боюнча кененирээк маалымат берүүнү убада кылып, бул маселе муниципалитеттин көзөмөлүндө экенине ишендирди.

Эскерте кетсек, буга чейин Reporter.kg редакциясына Оштун тургуну Улугбек Назаров кайрылган. Ал Моминов көчөсү, 1 (мурунку Светлый тар көчөсү) дарегиндеги үйүнүн жанында беш кабаттуу имарат курулуп жатканын билдирген.

Назаровдун ырастоосунда, курулуп жаткан объекттин дубалы анын үйүнөн болжол менен бир метрдей эле аралыкта жайгашкан. Ошондой эле ал курулуштан короого арматура, мык, бетон сыныктары жана башка буюмдар түшүп жатканына даттанган.

Буга чейин Мамлекеттик архитектура-курулуш көзөмөлүнүн Ош шаардык башкармалыгы арыз ээсине объектте арматура иштерин жүргүзүүдө техникалык коопсуздук талаптары бузулганы аныкталганын билдирген.

Куруучуга айып пул салынып, курулуш нормаларын жана коопсуздук эрежелерин сактоо зарылдыгы тууралуу эскертүү берилген.

Анара Мамытова