Бишкектеги Ден соолукту чыңдоо борбору кыргызстандыктарга оорулуу адамдан соо адамга илдеттүү чиркейлердин чагуусу аркылуу жугуучу безгектин (маляриянын) белгилери жана алдын алуу чаралары тууралуу эскертти.

Дарыгерлердин маалыматы боюнча, оорунун козгогучу болуп плазмодий митеси саналат.

Чиркей оорулуу адамды чаккандан кийин илдетти жуктуруп алат да, кийин инфекцияны башка адамдарга таратат.

Безгектин негизги белгилерине дене табынын көтөрүлүшү, ысытма, чыйрыгуу, катуу тердөө, баш оору, алсыздык жана шалдыроо кирет. Оор учурларда бейтап эстен танышы мүмкүн. Белгилер эки-үч күн аралыгы менен циклдик түрдө кайталанып турушу ыктымал.

Адистер оорунун алгачкы белгилери байкалганда эле токтоосуз түрдө медициналык жардамга кайрылууга чакырат. Өз убагында дарыланбаса, безгек аз кандуулукка (анемияга), боордун, көк боордун жана башка органдардын жабыркашына, ошондой эле организмдин жалпы уулануусуна (интоксикацияга) алып келиши мүмкүн.

Оорунун алдын алуу үчүн адистер чиркейден коргоочу торлорду, репелленттерди жана башка коргонуу каражаттарын колдонууну сунушташат.

Мындан тышкары, дарыгерлер токтоп калган суусу бар көлчүктөрдү жок кылууга, саздак жерлерди кургатууга, арыктарды чөп-чардан тазалоого, ошондой эле үйлөрдүн жана эс алуучу жайлардын тегерегин таза кармоого кеңеш беришет.