Бишкек шаарынын мэри Эмилбек Абдыкадыров кызмат ордуна сынактык тандоодон өтө элек. Бул тууралуу бүгүн, 26-июлдагы мааламат жыйында Мамлекеттик кызмат жана жергиликтүү өзүн-өзү башкаруу иши боюнча мамлекеттик агенттиктин директору Элчибек Жантаев билдирди.

Маалымат жыйында журналисттердин бири президент тарабынан дайындалган Бишкек шаарынын мэри сынактык тандоодон качан өтөрү тууралуу суроо узаткан.

Жантаевдин айтымында, мэр кызматка дайындалгандан соң үч айдан кийин сынактан өтүшү керек. Бирок бүгүнкү күнү анын дайындалышынан бери үч айдан көп убакыт өткөн. Жантаев мэр жакында сынактан өтөрүн айтып, бирок мыйзамда мэр үч айдан кийин сынактан өтпөсө, кызматтан кетиш керек деген норма жок экенин белгилеп өттү.