Бишкек шаарынын мэри Айбек Жунушалиев борбордогу бир катар билим берүү мекемелерин, анын ичинде №56 орто мектепти, №39 гимназияны, №117 жана №87 бала бакчаларды текшерди.

Мэриядан билдиришкендей, соцтармактарда айтылып келгендей, №56 мектептин абалы кейиштүү экени жеринде да тастыкталды.

Текшерүүнүн жыйынтыгында:

• Октябрь райондук администрациясынын башчысынын орун басары Асел Садыкова жана райондук билим берүү башкармалыгынын башчысы Нурлан Байгулов кызматынан бошотулду;
• Октябрь райондук администрациясынын башчысы Жаныбек Орозалиевге эскертүү берилди;
• Мэрдин орун басары Виктория Мозгачева жана Бишкек шаарынын билим берүү башкармалыгынын башчысы Рахат Мусаева тартиптик жазага тартылды.

Мэр №56 мектептеги бардык кемчиликтерди 22-сентябрга чейин жоюуну тапшырды. Анын ичинде:

• тротуарларды оңдоо;
• жашыл аянтчаларды калыбына келтирүү;
• спорт залдагы жарыктандырууну алмаштыруу;
• жертөлөлөрдү жабуу;
• окуучулардын коопсуздугун камсыз кылуу үчүн тосмолорду орнотуу.

Мындан тышкары, мектепти келерки жылдын капиталдык оңдоо тизмесине киргизүү жана резервдик фонддон кошумча каражат бөлүү чечими кабыл алынды.

Калаа мэри ошондой эле №39 мектеп-гимназиясын, №117 жана №87 бала бакчаларды да текшерип, оңдоо иштерин тездетүүнү жана коопсуздук эрежелерин так сактоону талап кылды.