Дүйнөгө белгилүү колумбиялык ырчы Шакира Бишкекке 17-октябрда келет. Ал эми эртеси, 18-октябрда ырчы Bishkek Arena стадионунда чоң жеке концертин коёт. Бул тууралуу КР Президентинин Иш башкармалыгы билдирет.

Эске салсак, бул өнөр тартуулоо Шакиранын Борбор Азиядагы алгачкы жеке концерти жана Кыргызстандагы эң ири музыкалык окуялардын бири болуп калмакчы.

Иш-чарага даярдык көрүүнүн жүрүшүндө артисттин командасынын өкүлдөрү Bishkek Arena стадионунун масштабын жана инфратүзүмүн жогору баалап, анын дүйнөлүк деңгээлдеги шоуну өткөрүү мүмкүнчүлүктөрүн белгилешти.

Концертке он миңдеген көрүүчүлөр, анын ичинде ырчынын Казакстан, Өзбекстан, Орусия жана башка өлкөлөрдөн келген күйөрмандары чогулары күтүлүүдө.

Мындай масштабдагы иш-чараларды өткөрүү окуялык туризмди өнүктүрүүгө, Кыргызстандын эл аралык деңгээлдеги таанылышын жогорулатууга, ошондой эле өлкөдөгү туристтик жигердүүлүктүн өсүшүнө өбөлгө түзөт.

Шакиранын концерти 2026-жылдын 18-октябрында Bishkek Arena стадионунда өтөт. Билеттер ticket.gov.kg расмий сайтында жеткиликтүү.