Бишкек шаарында Ж. Пудовкин көчөсүнүн К. Молдобасанов көчөсүнө чейинки уландысы болгон жаңы жолдун курулушу толугу менен аяктап, транспорт кыймылы үчүн толугу менен ачылды. Бул тууралуу шаар мэриясы билдирди.

Маалыматка ылайык, жолдун жалпы узундугу 970 метрди, туурасы 12-14 метрди түзөт. 3 кыймыл тилкеси каралган. Ошондой эле жол белгилери орнотулуп, жөө адамдар үчүн тротуар курулуп, асфальт төшөө иштери толугу менен бүткөрүлүп, жол чиймелери түшүрүлгөн.

Мэр Айбек Жунушалиев аталган жол тилкесин жеринен көрүп чыгып, курулуш иштери белгиленген мөөнөттө бүткөнүн билдирген.

Мэрия аталган жол тилкесинде оор жүк ташуучу унаалар үчүн чектөөлөр киргизилгенин кошумчалады.