19–25-сентябрь аралыгында Бишкек шаарында атмосферадагы булгоочу заттардын деңгээли чектен ашканы катталды. Кыргызгидрометтин маалыматы боюнча, абадагы негизги булгануучу заттардын орточо суткалык концентрациясы белгиленген ченемден 2,67 эсеге жогору болгон.

Адистердин айтымында, абанын бул деңгээлде булганышы шаар тургундарынын ден соолугуна олуттуу коркунуч жаратат. Өзгөчө балдарга, улгайган адамдарга жана өнөкөт дем алуу органдарынын оорулары бар жарандарга терс таасир этүү ыктымалдыгы жогору.

Саламаттыкты сактоо боюнча адистер мүмкүн болушунча сыртка аз чыгууга жана жеке коргонуу каражаттарын колдонууга чакырышууда.