Бишкекте шаардык автобустарда балдар коляскаларын алып жүрүү үчүн акы алуу сыноо иретинде бир айга токтотулду. Мэр Айбек Жунушалиевдин айтымында, балдар коляскасы үчүн акы алууну караган мурдагы тартип негизсиз болуп саналат.

Ал «Бишкек шаардык транспорту» муниципалдык ишканасынын директору Талант Капаровго жаңы эрежелерди туруктуу негизде беките турган Бишкек шаардык кеңешинин чечиминин долбоорун даярдоону тапшырды. Ага чейин балдар коляскаларын акысыз алып жүрүү пилоттук долбоордун алкагында иштей берет.

«Бишкек шаардык кеңешине чечим даярдагыла. Муну бир айлык пилоттук долбоор кылып жасайлы. Нормативдик документтерге өзгөртүүлөр киргизилгиче, мындай чечимди азыртадан эле кабыл алса болот. Буйруктун долбоорун даярдагыла, ага өзүм кол коём», — деди мэр.

Ошондой эле автобус айдоочуларына балдардын коляскасы үчүн акы албоо тапшырылды.

Күн сайын Бишкектин автобустарында кичинекей балдары бар жүргүнчүлөрдүн 200гө жакын сапары катталат.