Бишкекте Hyundai Sonata унаасы менен скутердин катышуусунда жол кырсыгы болду. Бул тууралуу Милициянын кайгуул кызматынан билдиришти.

Жол кырсык 8-сентябрда болжол менен саат 21:35те болгон. Hyundai Sonata’нын 25 жаштагы айдоочусу (А.А.) Курманжан датка көчөсү менен түндүктү көздөй баратып, Суворов көчөсүнө жеткенде, артка бурулмакчы болгон. Унаа бурулуп жатканда, аны артынан келе жаткан скутер сүзгөн.

Натыйжада скутердин 18 жаштагы айдоочусунун (И.Ж.) мээси чайкалып, оң буту сынган. Ал Чүй облустук ооруканасына жеткирилген.

Унаа менен скутер айып короосуна коюлуп, тиешелүү соттук-экспертизалар дайындалган. Учурда тергөө иштери жүрүүдө.

Кайгуул кызматы айдоочуларды жол эрежесин сактоого, ылдамдыкты ашырбай айдоого чакырат.