19-августта Бишкек шаарындагы Т. Сатылганов атындагы Улуттук филармонияда «Театр алдыга умтулат» аттуу атайын театралдык программа өтөт. Бул тууралуу Маданият министрлиги жарыялады.

Программа кыргызстандык көрүүчүлөрдү Корея Республикасынын заманбап театр искусствосу жана артисттеринин чыгармачылыгы менен тааныштырат. Программа саат 19:00дө башталат. Кирүү акысыз.

Иш-чара Сеул искусство жана маданият фондунун (SFAC) өкүлдөрүнүн Кыргызстанга болгон сапарынын алкагында уюштурулууда. Анын максаты — Кыргызстан менен Түштүк Кореянын маданий байланыштарын чыңдоо, эки өлкөнүн искусство ишмерлеринин ортосунда тажрыйба алмашуу жана биргелешкен долбоорлорго жол ачуу болуп саналат.