Бишкек шаарынын мэриясы жалпы салмагы 18 тоннадан ашкан жүк ташуучу унаалардын муниципалдык унаа жолдордо жүрүүсүнө киргизилген чектөө 1-октябрга чейин күчүндө болорун билдирди.

Чектөө 2026-жылдын 20-майында киргизилген. Абанын температурасы +28 °C жана андан жогору болгон учурда, күн сайын саат 09:00дөн 19:00гө чейин оор жүк ташуучу унаалардын жүрүүсүнө жол берилбейт.

Бул чара жолдун асфальт-бетон жабуусун сактоо жана муниципалдык унаа жолдорунун пайдалануу мөөнөтүн узартуу максатында кабыл алынган.

Мэрия айдоочуларды жана транспорттук компанияларды маршруттарды пландаштырууда бул чектөөлөрдү эске алууга чакырат. Унааларды температуралык режимди эсепке алуу менен жогоруда белгиленген убакыттан тышкары айдоо сунушталат.