18-октябрда Бишкек шаарынын көчөлөрүндө Швейцариянын 220 жылдан ашык тарыхы бар «La Landwehr de Fribourg» үйлөмө аспаптар оркестринин парады өтөт. Бул тууралуу Маданият министрлиги билдирди.

Музыкалык парад саат 13:00дө башталып, анда оркестр ачык асман алдында чыгармаларды аткарышат. Жүрүш Эркиндик бульвары менен Жоомарт Бөкөнбаев көчөсүнүн (ошондой эле Линейная көчөсүнүн) кесилишинен башталып, Улуттук тарых музейинин алдында аяктайт. Парадды көрүү акысыз.

Швейцариялык оркестр Кыргызстанга биринчи жолу келүүдө. Параддан кийин алар борбор калаадагы Абдылас Малдыбаев атындагы Кыргыз улуттук академиялык опера жана балет театрында концерт беришет.