Президент Садыр Жапаров 15-октябрда Азиядагы өз ара аракеттенүү жана ишеним чаралары боюнча кеңештин (АӨКЧМ) жетинчи саммитине катышуу үчүн Баку конгресс-борборуна келди.

Мамлекет башчысын Азербайжандын президенти Илхам Алиев тосуп алды. Саламдашуу аземинен жана биргелешип сүрөткө түшүүдөн кийин делегациялардын башчылары форум өтүп жаткан залга өтүштү.

Азербайжан 2024–2026-жылдары АӨКЧМге төрагалык кылууда. Ошондуктан саммит Баку шаарында өтүп жатат. Кеңешке Азиянын аймагынын жана калкынын болжол менен 90%ын камтыган 28 мамлекет мүчө.

Саммиттин жыйынтыгында Баку декларациясын жана уюмдун ролун, натыйжалуулугун жогорулатууга багытталган чечимдер топтомун кабыл алуу пландалууда.