Бишкектин Манас проспектиси менен Чокморов көчөсүнүн кесилишинде 3 жашар бала канализациянын ачык люгуна түшүп кеткен. Бул тууралуу Instagramдагы black_list.kg баракчасынын катталуучусу билдирди.
«Кечээ биз балдар менен дүкөнгө бардык. Алар газондо басып бара жатышкан. Чокморовго жете электе кичүү уулум менин көз алдымда жерге кулап, бакырып кирди. Суусу бар ачык люк бар экен. Күйөөм люкка секирип, баланы алып чыкты. Уулум үч жашта, коркуп кетти. Бактыга жараша эч нерсе болбоптур, сууну жутканга үлгүрбөй калыптыр. Күүгүм кирип, тротуардан люкту көргөн жокпуз, балам аны чөптүн арасынан байкаган жок. Бишкек шаардык мэриясынан бул кооптуу жайга көңүл буруусун талап кылабыз», — деп жазган ал.
