Бишкек шаарында 13-майдан 20-майга чейин «Саламат жүрөк — чекаптан өт» аттуу маалыматтык-алдын алуу акциясы өтөт. Бул тууралуу Саламаттык сактоо министрлиги маалымдады.

Иш-чарага Улуттук кардиология жана терапия борборунун адистери, ошондой эле КММАнын жана Бишкек медициналык колледжинин ыктыярчылары катышат. Акциянын максаты — жүрөк-кан тамыр ооруларынын алдын алуу жана тобокелчилик факторлорун эрте аныктоо болуп саналат.

Акциянын алкагында жарандарга төмөнкүдөй медициналык кызматтар акысыз көрсөтүлөт:

• артериялык басымды өлчөө;
• дене салмагынын индексин аныктоо;
• кандагы канттын жана холестериндин деңгээлин өлчөө;
• кардиолог-дарыгердин кеңеши.

Иш-чаранын графиги (саат 10:00дөн 14:00гө чейин):

• 13–14-май: «Vefa» соода борбору (1-кабат);
• 16-май: «Бишкек Парк» соода-көңүл ачуу борбору (М-1 кабаты);
• 18-май: «Дордой Плаза» соода-көңүл ачуу борбору (жаңы корпус);
• 20-май: Орто-Сай базары.

Иш-чараны Саламаттык сактоо министрлиги, М. Миррахимов атындагы Улуттук кардиология жана терапия борбору жана Республикалык ден соолукту чыңдоо жана массалык коммуникация борбору уюштурууда.