Бишкекте Улуу Ата Мекендик согуштагы Жеңиштин 81 жылдыгына арналган «Жеңиш ырлары» аттуу автожүрүш өттү.

Коргоо министрлигинин басма сөз кызматы билдиргендей, иш-чарага «Республикалык согуштун, Куралдуу Күчтөрдүн, укук коргоо органдарынын жана ооруктун эмгекчилеринин ардагерлер кеңеши» коомдук бирикмесинин өкүлдөрү катышты. Автожүрүш башталар алдында Куралдуу Күчтөрдүн Башкы штабынын башчысы — коргоо министринин биринчи орун басары Тариэль Отонбаев сөз сүйлөдү.

Унаалар колоннасы Бишкек — Байтик — «Ата-Бейит» мемориалдык комплекси — Арашан — 73809 аскер бөлүгү («Ала-Тоо» полигону) — Беш-Күнгөй — Бишкек багыты боюнча жүрдү.

Акциянын алкагында катышуучулар «Жеңиш» мемориалына гүл коюп, курман болгон баатырларды эскеришти, ошондой эле согуш жылдарындагы ырларды аткарышты.

Автожүрүштү өткөрүүнү камсыз кылуу үчүн министрлик унааларды бөлүп берип, колоннаны коштоону жана иш-чараларды координациялоону уюштурду.