12-ноябрдын кечинде дүйнө жүзүндөгү колдонуучулар Microsoft кызматтарынын, анын ичинде Outlook жана Teams тиркемелеринин ишиндеги үзгүлтүктөргө туш болушту. Көйгөй он сааттан ашык созулуп, ар кайсы өлкөлөрдөгү бизнеске жана мамлекеттик мекемелерге таасирин тийгизди. Компания үзгүлтүк киберчабуул менен байланыштуу болбогонун билдирди.

Көйгөйлөр тууралуу алгачкы билдирүүлөр 12-ноябрда Гринвич убактысы боюнча саат 16:15тен кийин түшө баштаган. Downdetector кызматындагы даттануулардын эң көбү Гринвич боюнча саат 18:00гө туура келип, дээрлик 140 миңге жеткен. Downdetector маалыматы боюнча, көйгөйлөр жалпысынан 74 өлкөдө катталган.

Үзгүлтүк Teams, Word, Excel, PowerPoint жана Outlook кирген Microsoft 365 пакетинин булуттагы кызматтарына, ошондой эле Copilot жасалма интеллект жардамчысына таасир эткен. Алгач Microsoft Түндүк жана Түштүк Америкадагы колдонуучулардагы көйгөйлөр тууралуу билдирип, кийин башка аймактарда да үзгүлтүктөр болушу мүмкүн экенин тактаган.

Microsoft компаниясынын аткаруучу вице-президенти Чарльз Ламанна кара ниет аракеттердин же киберчабуулдун белгилери жок экенин айтты. Компания үзгүлтүктү бир нече аймактагы серверлерге жүктүн көбөйүшү менен түшүндүрдү: серверлердин бир бөлүгү иштебей калып, калгандарына жүк көбөйгөн. Microsoft жаңыртууларды жайылтууну токтотуп, трафикти башка жакка багыттап, серверлерди кайра иштете баштаган, бирок жүк кайтып келгенден кийин калыбына келтирилген серверлер кайрадан жооп бербей калышы мүмкүн болгон.

13-ноябрда эртең менен Microsoft көйгөйдү жоюу чаралары күтүлгөндөй жүрбөгөнүн билдирди. Бир нече сааттан кийин компания туруктуулук жакшырганын, бирок жылыш анча чоң эмес экенин белгиледи. РБКнын маалыматы боюнча, 13-ноябрда Москва убактысы боюнча саат 13:00дө үзгүлтүк дагы эле уланып жаткан.

Үзгүлтүктөн улам АКШнын көптөгөн штаттарында муниципалитеттердин, укук коргоо органдарынын жана мамлекеттик мекемелердин ишинде көйгөйлөр жаралган. Австралияда кызматтар мектептерде, соттордо жана мамлекеттик мекемелерде иштеген эмес. Гонконгдо Morgan Stanley, Goldman Sachs жана башка банктардын кызматкерлери электрондук почтаны жана Teams тиркемесин колдоно алышкан эмес. Жапонияда министрликтердин кызматкерлери жумуш күнүнүн көп бөлүгүндө электрондук кат жөнөтө алышкан эмес. Улуу Британияда Улуттук саламаттык сактоо кызматынын системаларынын иши бузулган. Филиппиндин Жогорку соту электрондук почтаны иштетүүдө кечигүүлөр болушу мүмкүн экенин эскерткен.

Ушундан улам 13-ноябрда NASDAQ биржасындагы алдын ала тооруктарда Microsoft акциялары 3,23%га, 506,12 долларга чейин төмөндөгөн.