Бишкекте мотоскутер айдаган өспүрүм каза болгон жол кырсыгы боюнча кылмыш иши козголду. Lexus унаасынын айдоочусу кармалды. Бул тууралуу шаардык ички иштер башкы башкармалыгы (ШИИББ) билдирди.

Кырсык 24-октябрда саат 01:50 чамасында Чыңгыз Айтматов проспектиси менен Москва көчөсүнүн кесилишинде болгон. Алдын ала маалымат боюнча, 2001-жылы туулган Lexus LX 570 унаасынын айдоочусу Айтматов проспектиси менен түштүктү көздөй бара жатып, жол чырактын кызыл түсүнө өтүп кеткен. Ал Москва көчөсү менен чыгышты көздөй бара жаткан мотоскутер менен кагышкан.

Соккудан кийин мотоскутер жана аны айдап бара жаткан 2010-жылы туулган өспүрүм Айтматов проспектисинде түндүктү көздөй бара жаткан тилкеде жол чырактын алдында токтоп турган Weltmeister EX-5 унаасына барып урунган. Өспүрүм ошол жерде каза болгон.

Кырсык фактысы боюнча Кылмыш-жаза кодексинин 312-беренесинин 3-бөлүгү («Автомототранспорттун кыймылынын коопсуздук эрежелерин жана аны пайдалануу талаптарын бузуу») менен кылмыш иши козголду. Lexus унаасынын айдоочусу Жазык-процесстик кодекстин 96-беренесине ылайык кармалып, Бишкек ШИИББдин убактылуу кармоочу жайына киргизилди.

Посмотреть эту публикацию в Instagram

Публикация от Reporter.kg (@reporter_kg)

Учурда окуянын бардык жагдайларын аныктоо үчүн тергөө амалдары жүргүзүлүүдө. ШИИББ жол кыймылынын бардык катышуучуларын эрежелерди так сактоого, жол чырактын сигналдарына көңүл бурууга жана жолдогу жоопкерчиликтүү жүрүм-турум айланадагылардын өмүрүнө жана коопсуздугуна түздөн-түз таасир этерин унутпоого чакырды.