Бишкек шаарындагы №67 мектептин аймагындагы мурда мыйзамсыз менчиктештирилген имараттар кайрадан мамлекетке кайтарылып, жаңы окуу жылына чейин оңдолмокчу.

Шаар мэриясынын токтомуна ылайык, Бөкөнбаев көчөсүндө жайгашкан жана жалпы аянты 751 чарчы метр болгон турак жай эмес жайлар муниципалдык менчикке кабыл алынды. Бул имараттарда класстык бөлмөлөр уюштурулат.

Чечимдерди даярдоо башкармалыгынын башчысы Илияс Колопов Капиталдык курулуш башкармалыгына оңдоо иштерин кыска мөөнөттө аяктоону, ал эми «Бишкек жашыл курулуш» ишканасына аймакты жашылдандырууну тапшырды.

Борбор калаанын билим берүү департаментине жана мектеп жетекчилигине жүргүзүлүп жаткан иштерди өзгөчө көзөмөлгө алуу милдети жүктөлдү.