Кыргызстандык балбан Кубаныч Арынов грек-рим күрөшү боюнча жаштар арасындагы дүйнө чемпионатында коло медаль тагынды. 23 жашка чейинки спортчулар катышкан мелдеш АКШнын Лас-Вегас шаарында өтүп жатат. Арынов 60 кг чейинки салмак категориясында күч сынашты.

Бишкек убактысы боюнча 14-октябрда таңга маал грек-рим күрөшү боюнча алгачкы беш медалдын ээлери аныкталды. Кыргызстандык балбан мелдешти 1/8 финалдан баштап, алгачкы беттешинде америкалык спортчуну 64 секундда жеңди. Чейрек финалда азербайжандык балбанга утулуп калды. Ал кийин финалга чыкты.

Коло медаль үчүн өткөн көңүл жубатуучу беттештерде Арынов биринчи айлампада Польшанын өкүлүн мөөнөтүнөн мурда жеңди. Үчүнчү орун үчүн болгон беттеште Өзбекстандын балбанын далысын жерге тийгизип, жеңишке жетти. Жыйынтыгында кыргызстандык спортчу үчүнчү орунду ээледи. Бул салмак категориясында экинчи коло медалды япониялык Сэйма Токухара алды.

Финалда Казакстандын өкүлү Айбек Айтбеков Азербайжандын балбаны Элмир Алиевди жеңди.

Бул медаль Кыргызстан үчүн учурдагы дүйнө чемпионатындагы алгачкы байге болду.