Өлкө башчы Садыр Жапаров Кыргызстандын мамлекеттик билим берүү мекемелеринде окугандардын стипендияларынын өлчөмдөрүн жогорулатуу жөнүндөгү жарлыкка кол койду. Бул тууралуу «Эркин-Тоо» гезитине жарыяланды.

Жарлыкка ылайык, 2027-жылдын 1-сентябрынан баштап кесиптик баштапкы, орто жана жогорку билим берүүнүн мамлекеттик уюмдарынын студенттерине, ошондой эле жогорку окуу жайдан кийинки билим алуучуларга төлөнүүчү стипендиялардын көлөмү жогорулайт.

Мындай чечим окуучуларды, студенттерди жана жогорку окуу жайдан кийинки билим алуучуларды материалдык жактан колдоо максатында кабыл алынды.

Министрлер Кабинетине 2027-жылга жана 2028–2029-жылдардын пландык мезгилине республикалык бюджеттин долбоорун иштеп чыгууда бул чыгымдар үчүн каражат караштыруу милдети коюлду.