Улуттук коопсуздук боюнча мамлекеттик комитет (УКМК) Threads соцтармагынын колдонуучусу бийликти күч менен басып алууга ачык чакырыктарды камтыган материалдарды тараткандыгы үчүн кармалганын билдирди.

Атайын кызматтын маалыматында, 46 жаштагы А.А.М. аталган соцтармак аркылуу мамлекеттик бийликти басып алууга чакырган жана коомдук тартипти бузууга багытталган билдирүүлөрдү системалуу түрдө жайгаштырып келгени аныкталган. Кармалган жаран бул аракеттерин мойнуна алган.

Бул факт боюнча Кылмыш-жаза кодексинин «Маалыматтык-коммуникациялык тармактарды пайдалануу менен бийликти күч менен басып алууга ачык чакырыктар» беренеси менен кылмыш иши козголду. Шектүү УКМКнын тергөө абагынын убактылуу кармоочу жайына киргизилип, учурда тергөө амалдары уланып жатканы айтылды.