БУУнун Жакынкы Чыгыштагы тынчтык жараяны боюнча Атайын координаторунун орун басары Рамиз Алакбаров БУУнун Коопсуздук кеңешинин жыйынында Иордан дарыясынын Батыш жээгиндеги кырдаал тездик менен начарлап жатканын билдирди. Анын айтымында, бул абал аймактагы жаңжалдын мындан ары күчөшүнө алып келиши мүмкүн.

Анын айтымында, акыркы бир жума ичинде Батыш жээкте зомбулук фактылары кескин көбөйдү. Израилдик конуштардын тургундары палестин кыштактарына кол салса, палестиналыктар да израилдиктерге каршы чабуулдарды жасашкан. Натыйжада эки тараптан тең адамдар, анын ичинде бир бала каза болду.

Алакбаров Израилди конуштардын тургундары тарабынан жасалган зомбулуктун алдын алууга жана палестин жамааттарынын коопсуздугун камсыздоого чакырды. Ошондой эле ал эл аралык укук боюнча Батыш жээктеги израилдик конуштар мыйзамсыз деп эсептелерин эске салды.

БУУ өкүлү Газа секторундагы гуманитардык кырдаалга да токтолду. Айрым оң өзгөрүүлөр болгону менен, аймактагы калктын басымдуу бөлүгү дагы эле гуманитардык жардамга көз каранды экенин, ал эми кыйроолор өтө чоң бойдон калып жатканын айтты. Анын айтымында, кыш мезгилинин жакындашы абалды ого бетер оорлотот.

Мындан тышкары, Алакбаров Израилдин салыктык түшүүлөрдү кармап турушунан улам Палестина администрациясы финансылык кыйроонун босогосуна келип калганын билдирди. Бул билим берүү жана саламаттык сактоо тармактарынын ишине, ошондой эле мамлекеттик кызматкерлердин айлык акысын төлөөгө терс таасирин тийгизүүдө.

Анын айтымында, кырдаалды турукташтыруу үчүн Газадагы жаңжалды токтотуу боюнча комплекстүү план толук аткарылышы керек. Анда ХАМАСты куралсыздандыруу, Израилдин аскерлерин Газадан чыгаруу жана эл аралык стабилдештирүү күчтөрүн жайгаштыруу каралган.

Ошондой эле Алакбаров Палестинанын президенти Махмуд Аббастын парламенттик шайлоону 28-ноябрга дайындоо чечимин кубаттап, бул палестиналык институттарды чыңдоого жана калктын ишенимин калыбына келтирүүгө багытталган маанилүү кадам экенин белгиледи.

Кошумчалай кетсек, Израиль менен палестиналык ХАМАС кыймылынын ортосундагы жаңжал 2023-жылдын 7-октябрында ХАМАСтын Израилдин түштүгүнө жасаган кол салуусунан кийин кескин күчөгөн.

Буга жооп катары Израиль Газа секторунда кеңири масштабдагы аскердик операцияны баштаган. Ошондон бери аймактын чоң бөлүгү талкаланып, миллиондогон адамдар жер которууга аргасыз болгон. Калктын басымдуу бөлүгү гуманитардык жардамга көз каранды болуп калды.

Ошол эле учурда Иордан дарыясынын Батыш жээгинде да чыңалуу күчөгөн. Ал жерде Израилдин аскерлери, жөөт конуштарынын тургундары жана палестиналыктардын ортосунда кагылышуулар көбөйгөн.

БУУ жана дүйнөнүн көпчүлүк өлкөлөрү Батыш жээктеги израилдик конуштарды эл аралык укукка каршы келет деп эсептешет. Израиль болсо бул көз карашка макул эмес.