Чүй облусундагы 30 мектепке жана бала бакчага экологиялык таза жылытуу системаларын — жылуулук насосторун орнотуу пландалууда. Бул 2029-жылга чейин Жаратылыш ресурстары министрлиги Кореянын Эл аралык кызматташтык агенттиги (KOICA) менен биргеликте ишке ашырып жаткан «Кыргыз Республикасында абанын сапатын жакшыртуу» долбоорунун пилоттук бөлүгү болуп саналат.

Долбоордун жалпы бюджети 10 млн долларды түзөт.

Жылытуу жабдууларын орнотуудан тышкары, долбоордун алкагында жаңы системалар менен иштей турган адистердин квалификациясын жогорулатуу жана аларды окутуу пландалууда.

Мындан тышкары, Бишкек шаарында абаны булгоочу заттардын чыгышын азайтуу боюнча булгануу булактарын эске алган чаралар көрүлөт. Ошондой эле 2028–2038-жылдарга карата абанын сапатын башкаруунун комплекстүү планы иштелип чыгат.

Долбоордун максаты — атмосфералык абанын сапатын жакшыртуу, жылытуу системаларынын экологиялык натыйжалуулугун жогорулатуу жана абанын булганышын азайтууга багытталган туруктуу чечимдерди киргизүү.