Түштүк Кореядан келген турист Чүй облусунун Көл-Төр көлүнө бара жаткан жолдо каза болду. Өзгөчө кырдаалдар министрлигинин куткаруучулары адамдын сөөгүн жерге түшүрүштү.

Өзгөчө кырдаалдар министрлигинин басма сөз кызматы билдиргендей, 4-декабрда саат 13:22 чамасында туристтер тобу Чүй облусунун Кегетин капчыгайынын тоолорунда жайгашкан Көл-Төр көлүнө жөнөп кетишкен. Каза болгон жаран 1951-жылы туулган Л.Ж.  (Түштүк Кореянын жараны) белгисиз себептерден улам эсин жоготкон. Бул тууралуу Өзгөчө кырдаалдар министрлигинин 112 кызматына кабарлашты.

Окуя болгон жерге №21 ӨКМнин 4 куткаруучусу барышкан. Токмок шаарынын куткаруучулары жарандын жансыз денесин тоодон түшүрүп, Ички иштер министрлигине өткөрүп беришкен.