Жогорку Кеңеш 9-сентябрда президенттик шайлоону өткөрүү датасын өзгөртүү жөнүндөгү мыйзам долбоорун үч окууда жактырды. Депутаттар түзөтүүлөрдү бир добуштан колдошту.

Мыйзамдын колдонуудагы редакциясына ылайык, кезектеги президенттик шайлоо президенттин ыйгарым укуктарынын мөөнөтү аяктай турган жылдын октябрь айынын үчүнчү жекшембисинде өткөрүлөт. Түзөтүүлөр аркылуу добуш берүү күнүн ошол эле жылдын январь айынын төртүнчү шаршембисине жылдыруу сунушталууда.

Ошол эле учурда шайлоону Жогорку Кеңеш тарабынан добуш берүү күнүнө чейин төрт айдан кечиктирбей белгилөө боюнча норма сакталып калат.