Президент Садыр Жапаров жалган маалымат таратып, анын айтымында, коомдогу туруктуулукка терс таасир тийгизгендерге мыйзам чегинде катуу чара көрүү зарылдыгын билдирди.

Жогорку Кеңеште сүйлөп жатып мамлекет башчысы маалыматтарды текшербей, анын кесепеттерин эске албай жайылтуу барган сайын кадимки көрүнүшкө айланып баратканын белгиледи.

«Жалган маалыматтарды таратып, тынч жаткан элдин башын айландырып, өнүгүүгө терс таасир эткендердин башынан сылап отурбайбыз», — деди президент.

Ал буга чейин да мындай аракеттерге карата чара көрүү зарылдыгы тууралуу айтканын эске салды.

«Андайларга мыйзам чегинде катуу чара көрүлөрүн буга чейин да айткам, азыр да айта кетейин», — деди Садыр Жапаров.