Бүгүн, 7-сентябрда, Бишкек шаарында Кыргызстандын Тышкы иштер министрлиги (ТИМ) менен Зимбабвенин Тышкы иштер жана эл аралык соода министрлигинин ортосунда алгачкы саясий консультациялар болуп өттү. Бул тууралуу ТИМдин басма сөз кызматы билдирди.

Кыргыз делегациясын тышкы иштер министринин орун басары Кайрат Турсункулов, ал эми Зимбабве делегациясын туруктуу катчы Альберт Р. Чимбинди жетектеген.

Иш-чарада тараптар эки өлкөнүн мамилелерин өнүктүрүүнү жана саясий диалогду чыңдоону талкуулашкан. Сүйлөшүүлөрдүн алкагында төмөнкү багыттарга көңүл бурулган:

• соода-экономикалык кызматташтык;
• геология, туризм жана санариптештирүү тармактарында тажрыйба алмашуу;
• 2027–2028-жылдарга БУУнун Коопсуздук Кеңешинин туруктуу эмес мүчөлүгү алкагында өз ара аракеттенүү.

Консультациялардын жыйынтыгында тараптар саясий диалогду улантуу жана макулдашууларды ишке ашыруу боюнча кызыкдарлыгын билдиришкен.