Дүйнөлүк банк Камбар-Ата-1 ГЭСинин курулушун мындан ары да каржылоого даяр экенин билдирди. Бул тууралуу энергетика министри Таалайбек Ибраев менен Дүйнөлүк банктын аймактык директору Наджи Бенхассиндин жолугушуусунда айтылган.

Жолугушууда энергетика тармагындагы долбоорлордун учурдагы абалы жана келечеги талкууланган. Анын ичинде Камбар-Ата-1 ГЭСинин долбоорун ишке ашырууда экологиялык жана социалдык аспектилерге артыкчылык берилери белгиленген.

Ошондой эле тараптар Борбордук Азиянын аймактык интеграциясы жана электр энергиясынын соодасы (REMIT) долбоору каралды. Бул демилге Жалал-Абад облусунун электр тармактарын чыңдоого, аймактык электр соодасын кеңейтүүгө жана энергетикалык инфраструктуранын ишенимдүүлүгүн жогорулатууга багытталган.