Бишкектеги Кыргыз-кытай бизнес-форумунда сүйлөп жатып, Кытайдын Кыргызстандагы атайын жана толук ыйгарым укуктуу элчиси Лю Цзянпин эки мамлекеттин стратегиялык өнөктөштүгү тез өнүгүп жатканын баса белгиледи.

Дипломат өз ара соода жүгүртүүнүн рекорддук динамикасын белгилеп, ал бүтүндөй Борбор Азия чөлкөмү боюнча алдыңкы орунга чыккан билдирди. Ошондой эле Кытайдын түз инвестицияларынын көп эсе өскөнүн айтты.

Элчи соода түзүмүнүн сапаттык өзгөрүүсүнө көңүл бурду: кыргыз продукциясынын Кытайга экспортунун көлөмү бир нече эсеге өстү, ал эми КЭРдин рыногуна экологиялык жактан таза тоо балы жана жемиштер ийгиликтүү жеткирилүүдө. Жүк ташууларды жеңилдеткен жаңы «Бедел» чек ара өткөрмө пунктунун ачылышы логистикага олуттуу салым болду.

Лю Цзянпин ошондой эле негизги биргелешкен долбоорлорду санап өттү, алардын ичинде — Кытай — Кыргызстан — Өзбекстан темир жолунун курулушу, Барскоон — Бедел автожолу, «Джунда» мунай иштетүүчү заводун модернизациялоо жана борбор калаадагы таштандыны кайра иштетүүчү экозаводду кеңейтүү бар. Анын айтымында, алдыңкы жабдууларды жана электромобилдерди жеткирүү Кыргызстандын «жашыл» экономикасы үчүн ишенимдүү пайдубал болуп кызмат кылат.