Кыргызстандын эл артисти жана балетмейстер Кубанычбек Сыдыков 66 жаш курагында дүйнөдөн кайтты. Бул тууралуу Маданият министрлиги билдирди.

Сыдыков чыгармачылык ишмердүүлүгүндө «Дон Кихот», «Жизель», «Ак куу көлү», «Щелкунчик», «Спартак» жана «Чолпон» сыяктуу классикалык балет спектаклдеринде 20дан ашык ролдорду аткарган. Балетмейстер катары «Издөө», «Саймалуу-таштар», «Баскычтар», «Түбөлүктүк», «Дуэль» жана «Жамийла» хореографиялык чыгармаларын сахнага койгон. Анын чыгармачылыгы авангарддык жана фольклордук багыттарды камтыган.

Кубанычбек Сыдыков кыргыз балетин Орусия, Казакстан, Өзбекстан, Кытай жана Түркия мамлекеттериндеги эл аралык фестивалдарда тааныткан. Ошондой эле педагог катары хореографтардын жана балет артисттеринин муунун тарбиялоо менен алектенген.