Мамлекеттик салык кызматы салык төлөөчүлөргө алдамчылар акча же жеке маалыматтарды алуу максатында өздөрүн салык органдарынын кызматкерлери катары тааныштырышы мүмкүн экенин эскертти.

МСКнын маалыматына караганда, алар телефон чалып же билдирүү жазып, салык карызы же айып пул бар экенин айтып, аны тез арада төлөөнү талап кылышат. Бул үчүн МСКнын атынан жасалма каттарды жана төлөм жүргүзүү үчүн QR-коддорду жөнөтүшү мүмкүн.

Мекеме салык органдарынын кызматкерлери сырсөздөрдү, ырастоо коддорун жана банк карталарынын маалыматтарын сурабай турганын эскертти. Ошондой эле алар телефон же мессенджерлер аркылуу акча которууну, салыктарды жана карыздарды төлөөнү же отчет тапшырууну талап кылышпайт.

Эгер салык милдеттенмелери аткарылбаганы тууралуу билдирип, санкциялар менен коркутушса, алардын талаптарын шашылыш аткарууга болбойт. Маалыматты Салык төлөөчүнүн кабинети аркылуу текшерүү же салык органына кайрылуу зарыл. Телефон номерлери sti.gov.kg сайтынын «Байланыштар» бөлүмүндө көрсөтүлгөн.

Алдамчылыкка кабылган учурда укук коргоо органдарына кайрылуу, зарыл болсо 102 номерине чалуу керек.

МСК шектүү шилтемелерге өтпөөгө, сырсөздөрдү, коддорду жана банк карталарынын маалыматтарын бербөөгө, белгисиз адамдарга акча которбоого, ошондой эле маалыматты расмий порталдардан жана сайттардан гана текшерүүгө чакырды.