Эми Кыргызстандын жарандары Таиланддын аймагында 30 күнгө чейин визасыз жүрө алышат. Жаңы тартип 2026-жылдын 15-сентябрынан тарта күчүнө кирет. Бул тууралуу аталган өлкөнүн Тышкы иштер министрлиги кабарлады.

Учурда колдонулуп жаткан эреже боюнча, Кыргызстандын жарандары Таиландга барганда аэропорттон виза (Visa on Arrival) алып, 15 күн жүрүүгө укуктуу. 15-сентябрдан тарта виза алуу зарылчылыгы жоюлуп, өлкөдө болуу мөөнөтү эки эсеге узарат.

Белгилей кетсек, Кыргызстанда Таиланддын жарандары үчүн да 30 күнгө чейинки мөөнөткө визасыз режим колдонулат. Таиланд өкмөтү бул чечимди бир катар мамлекеттер үчүн визалык режимди кайра карап чыгуунун алкагында кабыл алган. Жаңы эрежелер туристтик максаттагы сапарларга тиешелүү.