БУУнун Башкы катчысынын гуманитардык маселелер боюнча орун басары Том Флетчер Эль-Ниньо климаттык кубулушунун кайтып келиши мүмкүн экенин, бул дүйнөнүн ар кайсы аймактарында жаңы экстремалдык аптаптын толкунуна, кургакчылыкка жана суу ташкындарына алып келерин эскертти.

Анын айтымында, кесепеттери Латин Америкасы, Чыгыш жана Түштүк Африка, Азия жана Тынч океан аймагындагы өлкөлөргө тийиши мүмкүн. Эль-Ниньонун 2023–2024-жылдардагы мурунку циклы он миллиондогон адамдар үчүн азык-түлүк, ичүүчү суу жана медициналык жардамдын жетишсиздигине алып келген.

БУУ жаңы цикл мындан дагы кыйраткыч болушу мүмкүн деп эсептейт. Кырдаалды куралдуу чыр-чатактар, аргасыз жер которгондордун санынын өсүшү, күйүүчү майдын жана азык-түлүктүн кымбаттыгы, ошондой эле гуманитардык программаларды каржылоонун кыскарышы татаалдаштырууда.

Мүмкүн болгон кесепеттерге даярдык көрүү үчүн уюм Өзгөчө кырдаалдарга чара көрүү борбордук фондунан 100 млн долларга чейин каражат бөлүүнү көздөп жатат. Буга чейин алты өлкөдө алдын алуу чараларына 20 млн доллардан ашык каражат бөлүнсө, аялуу жамааттарды колдоо үчүн кошумча каржылоо Climate Action Account механизми аркылуу багытталууда.

Эль-Ниньо — бул Тынч океандын экватордук бөлүгүндөгү үстүнкү суулардын температурасынын көтөрүлүшүнө байланыштуу табигый климаттык кубулуш. Ал бүткүл дүйнөдөгү аба ырайына таасир этип, айрым аймактарда кургакчылыкты жана экстремалдык аптапты, ал эми башка жерлерде нөшөрлөгөн жаан-чачынды жана суу ташкындарын пайда кылат. Глобалдык климаттын өзгөрүшүнүн фонунда анын кесепеттери барган сайын олуттуу болууда.

«Биз кырсык болгончо күтүп отура берсек болот, же туруктуулукка азыртан инвестиция салсак болот», — деп билдирген Том Флетчер дүйнөлүк коомчулукту жаңы климаттык тобокелдиктерге алдын ала даярданууга чакырды.