Дарыгерлер селейме (столбняк) эң коркунучтуу жугуштуу оорулардын бири бойдон калып жатканын эскертишти. Бирок өз убагында эмдөөдөн өтүү жана жараатты туура тазалап-иштетүү ооруну жуктуруп алуунун алдын алат.

Бишкек шаардык ден соолукту чыңдоо борборунун адистери тактагандай, селейме — нерв системасын жабыркатып, булчуңдардын катуу тырышуусу (карышуусу) менен коштолгон курч мүнөздөгү жугуштуу оору. Анын козгогучу болуп Clostridium tetani бактериясы саналат.

Адистердин маалыматы боюнча, ооруну жуктуруп алган учурлардын 60%га жакыны бут кетменинин жаракаттарына байланыштуу. Коркунуч жылаңайлак басканда, мык, тикенек, жыгач сыныгы же терини жабыркатуучу башка ар кандай нерселерди басып алганда жаралат.

Оорунун инкубациялык (жашыруун) мезгили адатта 5 күндөн 14 күнгө чейин созулат, бирок 30 суткага чейин да жетиши мүмкүн. Мында инкубациялык мезгил канчалык кыска болсо, оору ошончолук оор өтөт.

Дарыгерлер Clostridium tetani бактериясынын споралары айлана-чөйрөдө кеңири таралгандыгын белгилешет. Алар топуракта, үй ичиндеги чаңда, жаныбарлардын заңында жана табигый көлмөлөрдө болушу мүмкүн. Бактерия тамак-аш аркылуу организмге киргенде ооруну жаратпайт, анткени ал ашказан-ичеги жолдору аркылуу сиңбейт. Коркунуч козгогуч жабыркаган тери аркылуу киргенде гана пайда болот.

Селейме адамдан адамга жукпай турганын дарыгерлер эскертишет. Бактерия организмге кир кирген, айрыкча терең же бир нерсе сайылып калган жараат аркылуу кирет. Өлүмгө алып келүү көрсөткүчү боюнча селейме жугуштуу оорулардын ичинен кутурмадан (бешенство) кийинки эле экинчи орунда турат.

Оорунун алдын алуу үчүн адистер өз убагында эмдөөдөн өтүүнү, жаракат албоо үчүн сактык чараларын сактоону, ошондой эле теридеги ар кандай жарааттарды өз убагында жана туура тазалап-иштетүүнү сунушташат.