Бюрократияны жоюу жана мамлекеттик кызмат көрсөтүүлөрдүн натыйжалуулугун жогорулатуу боюнча жүргүзүлүп жаткан мамлекеттик саясаттын алкагында, КР Юстиция министрлигине караштуу Соттук-эксперттик кызмат Түндүк-Чыгыш бажысынын «Кант» БЖЖ (бажылык жол-жоболоштуруу жайы) аймагында транспорттук-криминалистикалык экспертизаларды жүргүзүүчү туруктуу пунктту ачты.

Мекеменин маалыматына ылайык, бул чечим Кытайдан, Европа өлкөлөрүнөн жана башка мамлекеттерден Кыргыз Республикасына келип түшкөн жүк ташуучу жана жеңил унаалардын, электромобилдердин жана атайын техникалардын агымынын көбөйүшүнө байланыштуу кабыл алынган.

Бажылык жол-жоболоштуруу процедуралары дал ушул «Кант» БЖЖда жүргүзүлөт.

«Мурда эксперттик изилдөөлөрдү жүргүзүү үчүн арыздар чогулгандан кийин эксперттердин Бишкектен барышы талап кылынчу. Бул күтүү мөөнөтүн узартып, жарандар жана бизнес үчүн кошумча чыгымдарды жаратып, ошондой эле транспорт каражаттарынын (ТК) убактылуу сактоо кампаларында бош туруп калышына алып келген», — деди КР Юстиция министрлигине караштуу Соттук-эксперттик кызматтын төрагасы Талантбек Кожонов.

Бүгүнкү күндө, деп белгиледи ал, эксперт түздөн-түз жеринде болуп, унааны карап чыккандан кийин дароо корутунду даярдайт, бул кызмат көрсөтүү мөөнөтүн кыйла кыскартууга мүмкүндүк берди.

Ал экспертизага келген унаалардын олуттуу бөлүгүнүн документтеринде дал келбестиктер бар экенин баса белгиледи: айрым учурларда идентификациялык номерлердин өзгөртүлгөнү аныкталат же чыккан жылы туура эмес көрсөтүлөт.

Эксперттердин корутундулары бажы төлөмдөрүнүн туура эсептелишин камсыз кылууга мүмкүндүк берет жана мамлекеттик бюджетке милдеттүү төлөмдөрдү азайтып көрсөтүү аракеттеринин алдын алат.

«Мындан тышкары, процедураны оптималдаштыруу коррупциялык тобокелдиктерди азайтууга өбөлгө түзөт. Эксперттердин бажы процедуралары жүргүзүлүп жаткан жерде дайыма болушунун аркасында, бардык чечимдер эксперттик изилдөөнүн жыйынтыгынын негизинде гана кабыл алынат жана белгиленген тартипте жол-жоболоштурулат», — деп баса белгиледи Кожонов.