Бишкек — Суусамыр — Ош унаа жолунун Өтмөк жана Ала-Бел ашууларынын ортосундагы бөлүгүндө Орусиянын Алтай крайынан Кыргызстанга алып келинген үч марал көрүндү, деп билдирет Жаратылыш ресурстары, экология жана техникалык көзөмөл министрлигинин басма сөз кызматы.

Бул жаныбарлар 2022-жылы өздөрү алып келинген Талас облусундагы «Беш-Таш» мамлекеттик жаратылыш паркынын аймагынан өз алдынча чыгып кетишкен.

Маралдардын ашуулар аймагында жүргөнүн жергиликтүү малчылар кабарлашкан. Бул маалымат тиешелүү мамлекеттик органдарга өткөрүлүп берилгени такталды.

Мекемеден билдиришкендей, жакынкы убакта маралдарды жаратылыш паркына кайтаруу пландалууда.

Өзгөчө корголуучу жаратылыш аймактары жана биоартүрдүүлүк бөлүмүнүн кызматкерлери маралдар Кызыл китепке киргизилгенин эске салышты. Бул жаныбарларга зыян келтиргендиги үчүн кылмыш жоопкерчилиги, ошондой эле 1,5 миллион сом өлчөмүндө зыяндын ордун толтуруу каралган.

Жаратылыш ресурстары министрлиги маралдарды көрүп калган учурда кабар берүүгө жана аларды кубалоого же кармоого аракет кылбоого чакырды.