Каракол шаарында нөшөрлөп жааган жамгырдын кесепетинен Мамлекеттик ипотекалык компания (МИК) тарабынан курулган «Хан-Теңири» турак жай комплексинин төрт блогун тең суу каптады. Социалдык тармактарда суу тепкичтер менен агып, батирлерге жана желдетүүчү (вентиляциялык) шахталарга кирип жаткан видеокадрлар тарады.

МИКтин адистери бул окуянын негизги себеби — суу агызуучу лотоктордун жана түтүктөрдүн тиричилик таштандыларына бүтөлүп калышы экенин аныкташты. Ушундан улам чатырга суу топтолуп, басымдын таасири менен имараттын ичине агып кире баштаган. Компания Караколдогу бул абал чектелген (локалдык) мүнөзгө ээ экенин, ал эми катуу нөшөрдөн шаардын башка көптөгөн турак үйлөрү жана көчөлөрү да жапа чеккенин баса белгиледи.

Посмотреть эту публикацию в Instagram

Публикация от Reporter.kg (@reporter_kg)

Учурда кырсыктын кесепеттерин жоюу иштери күчөтүлгөн режимде жүргүзүлүүдө. МИК жабыркаган батирлерди өз каражатынын эсебинен толугу менен калыбына келтирип берерин расмий жарыялады. Мүлкү зыянга учураган бардык жашоочуларга эң кыска мөөнөттө керектүү оңдоо иштерин жүргүзүп берүү убада кылынды.