Кыргызстан менен Казакстандын ортосунда сооданын көлөмү өсүүдө, бирок чек арадагы маселелер бизнеске кыйынчылык жаратып жатат. Бул тууралуу Соода-өнөр жай палатасынын президенти Темир Сариев Бишкек шаарында өткөн Кыргыз-Казак ишкерлер кеңешинин кеңейтилген жыйынында айтты. Иш-чарага эки өлкөнүн ишкер чөйрөсүнүн өкүлдөрү катышкан.

Сариевдин айтымында, 2025-жылы өлкөлөр ортосунда товар жүгүртүү 63%га өсүп, 2,4 миллиард долларга жеткен. Ал эми 2026-жылдын сегиз айында Кыргызстандын Казакстанга экспорту дээрлик 14%га көбөйгөн.

Сариев мындай өсүшкө карабастан, чек арадагы абал дагы деле курч бойдон калып жатканын айткан. Жүк ташуучу унаалар чек арада узак убакыт кезек күтүп, товарлар бузулуп, ишкерлер чыгымга учуроодо. Мындан тышкары, Ысык-Көлгө келген туристтер да текшерүү пункттарында кыйынчылыктарга кабылууда.

Темир Сариев жыйында Казакстандын «Атамекен» палатасы менен биргеликте ишкерлердин сунуштарын өкмөткө киргизүүнү демилгеледи.

«„Атамекен“ палатасына ишкерлердин кайрылууларын биргелешип чогултуп, өкмөттөрүбүзгө макулдашылган сунуштарды киргизүүнү сунуштайм. Чек ара боордош элдерди бөлбөй, бириктириши керек»,- деген ал.

Мындан тышкары Сариев эки өлкөнүн өкмөттөрү тарабынан сегиз өткөрмө пунктун модернизациялоо боюнча жүргүзүлүп жаткан иштерди колдоп, бизнес бул аракеттердин натыйжасын азыртан күтүп жатканын белгиледи.

Чек ара боордош элдерди бөлбөй, тескерисинче, аларды бириктириши керек.

Темир Сариев

Соода-өнөр жай палатасынын президенти