Бишкектеги «Тазалык» муниципалдык ишканасына жалпы суммасы 92 миң сом болгон айып пул салынды. Буга ишкананын унаалары чыккан газдардын белгиленген ченемдерден ашып кеткени себеп болгон. Бул тууралуу Жаратылыш ресурстары министрлиги билдирди.

«Тазалыктын» унааларын пландуу текшерүүнү Бишкек шаары жана Аламүдүн району боюнча Экологиялык жана техникалык көзөмөл кызматынын аймактык башкармалыгы жүргүзгөн. Текшерүүнүн жыйынтыгында Укук бузуулар жөнүндө кодекс боюнча төрт протокол түзүлгөн.

Мындан тышкары, башкармалык ишканага унааларды тез арада оңдоп, техникалык кароодон өткөрүү боюнча көрсөтмө берген.