Караколдо масштабдуу реконструкциядан кийин шаардык пляж ачылды. Мэриядан билдиришкендей, жаңыланган аймак заманбап урбанистиканын принциптерин эске алуу менен түзүлгөн жана тургундардын, туристтердин ыңгайлуу эс алуусуна ылайыкташтырылган заманбап коомдук мейкиндик болуп саналат.

Ачуу аземине президенттин Ысык-Көл облусундагы ыйгарым укуктуу өкүлү Бакытбек Жетигенов, Каракол шаарынын мэри Талантбек Иманов, Каракол шаардык кеңешинин төрагасы Санжар Таштанбек уулу, муниципалдык кызматтардын өкүлдөрү, куруучулар, долбоорлоочулар, шаар тургундары жана коноктору катышты.

Реконструкциянын жүрүшүндө жээк сызыгы тазаланып, куму жаңыланды, сейилдөөчү жолдор жана эс алуу аймактары көрктөндүрүлдү. Пляждын аймагында беседкалар, бастырмалар, шезлонгдор, кийим которуучу жана жуунуучу жайлар (душ), ошондой эле санитардык аймактар пайда болду. Балдар жана спорт аянтчалары жабдылып, жарыктандыруу жана видеобайкоо камералары орнотулду, медициналык пункт жана куткаруу борбору каралган.

Бакытбек Жетигеновдун айтымында, Каракол Кыргызстандын негизги туристтик борборлорунун бири болуп саналат, ал эми шаардын инфраструктурасын өнүктүрүү Ысык-Көл облусу үчүн гана эмес, бүтүндөй өлкө үчүн чоң мааниге ээ.

Өз кезегинде Каракол шаарынын мэри Талантбек Иманов долбоордун бардык катышуучуларына ыраазычылык билдирип, жаңыланган пляж шаардык чөйрөнү өнүктүрүүнүн биргелешкен программасынын алкагында ишке ашырылган биринчи объект болуп калганын белгиледи. Анын айтымында, фонд менен өнөктөштүк шаар инфраструктурасынын сапатын жакшыртууга багытталган башка долбоорлорду да ишке ашырууга мүмкүндүк берет.

Келечекте беш мектеп жана беш бала бакчаны реконструкциялоо, 25 короону көрктөндүрүү, Жеңиш паркын жаңылоо, Каракол дарыясынын жээгин куруу, жолдорду оңдоо, сырткы жарыктандырууну, арык жана канализация системаларын модернизациялоо, ошондой эле жаңы шаардык автобустарды сатып алуу пландалууда.

Расмий аземден кийин шаар тургундары жана коноктору үчүн аниматорлордун катышуусундагы майрамдык программа, музыкалык номерлер жана балдар үчүн көңүл ачуучу оюндар уюштурулду.