Жогорку Кеңештин жыйынында депутат Исманали Жороев кыргызстандык ишкерлер менен жүк ташуучулар Казакстандын чек ара өткөрүү пункттарынын ишине нааразы болуп жатканын билдирди.

Анын айтымында, акыркы он күндөн бери Ак-Тилек өткөрмө бекетинен кийин Кордай тарапта жүктөрдү өткөрүүдө олуттуу кечигүүлөр жаралууда.

Депутат сөз Евразия экономикалык бирлиги өлкөлөрүнөн, анын ичинде Россиядан келе жаткан товарлар тууралуу болуп жатканын айтты.

«Казакстандын постунда ар бир унаадан 10 миң сом же 50 миң теңге талап кылышууда. Эгер төлөбөсө, жүктү бир-эки суткага чейин кармап жатышат», — деди Жороев.

Анын айтымында, рентген жабдуулары бар болгонуна карабастан, айдоочуларды жүктү өздөрү түшүрүп, кайра жүктөөгө мажбурлашууда.

Депутат мындай аракеттер товарлардын баасынын өсүшүнө алып келиши мүмкүн экенин белгиледи, анткени жүк ташуучулардын кошумча чыгымдары акыры керектөөчүлөргө жүктөлөт.

Буга байланыштуу ал Кыргызстандын бийлигин кырдаалды көзөмөлгө алып, чек арадагы маселени чечүүгө чакырды.