«Ынтымак Ордо» резиденциясында Министрлер кабинетинин төрагасынын орун басары Эрлист Акунбековдун жетекчилиги алдында калкты жана өлкөнүн ишканаларын күйүүчү-майлоочу майлар менен туруктуу камсыздоо маселелери боюнча жумушчу кеңешме өттү.

Талкууга Энергетика министрлигинин, финансы секторунун өкүлдөрү жана мунай продуктуларын ташып келүүчү негизги компаниялар катышты. Жолугушуунун катышуучулары ички рыноктогу учурдагы абалды, жеткирүү логистикасын жана республикада күйүүчү майдын жетиштүү запасынын бар экендигин кеңири талдап чыгышты.

Кеңешменин жыйынтыгында тармактык мамлекеттик органдарга жана уюмдарга КММ рыногундагы туруктуулукту сактоо жана мүмкүн болуучу үзгүлтүктөрдү алдын алуу боюнча тиешелүү тапшырмалар берилди.